مش ناوي ولا ااايه يا قناوي
قوووم يا واد سيبك من القهاوي والحكاوي والشكاوي
....
كبرت يا خوي ومش عاوز تجوز؟!!
عقلت ولا ايه؟!!
...
إخواتك عاوزين يفرحوا بيك وأنت مش هنا
عامل من بنها وأنت من قنا
...
عاوزها جميلة وأصيلة ومليانة وطويلة التيلة
ليه امّال .. مش رايقة .. ولا دماغك فايقة
ولا اليأس ملاك؟!! ... ياض أنت اللي ملاك!!
كفياك بزياده .. حتفضل مستني كتير
ما سابتك اللي رايدها ورايدلها الخير
خلصت خلاص ولا ااايه؟!!
قاعد قدام الدار بتعمل اااايه؟!!
...
قوووم شوفلك قصة جديدة
بنات الناس على قفا من يشيل
عيش معانا وسيبك من الخيال البخيل
لو كان خيالك كريم ماكنش رماك .. سنييييين هنا وهناك
خلّاك مش داري وعلى الناس بتداري
بس على مين يا واد .. دا احنا عجنينك وخبزينك
....
اصح .. فوووق
بكرة الدنيا ترووووق
جرّب الدنيا .. ما الدنيا تجارب
نجاح وفشل كأنك فيها بتحارب
ما تخافش من الفشل
ما الخايف من الحرامي قدامك اتنشل
..
كلنا قدامك أهو .. سكاكين الزمان في الدهر
وواقفين ولا هاممنا .. يا خي ملعون أبوه القهر
...
ارجع تاني زي ما كنت زمان
لسّاك شباب .. والشباب عمره ما يتهاب
...
مستنينك عند بيت فلان ... دا معاه بنت يتمناها الخُطاب
سبقناك وخطبنالك .. وهما راضين
حيناسبوا زيك فين؟!!
...
بعد المغرب المعاد أوعاك تنسى
البت جميلة وأصيلة ومليانة وطويلة التيلة .. هههههه
مبقاش ليك تاني يا عم طلبات
خلاص
أوعى تتأخر
وأنت وطالع تتبخر
مش تختفي اقصد تتعطر
...
سلام عشان عشانا عليك
عاشمنين في العشوة دي على أديك
واتجوز عمنا قناوي وبقي معاه عيال
